Sprawdzian to nie szpil z Hamerykom

Tyn fto załapoł sie na bilet losowany przez PZPN może czuć sie fes wyróżniony. Ponad milion ludzi zdzierało z siebie łachy, kiedy dowiedzieli sie, że nikaj nie jadom. Bynajmij nie bydom mieć biletów na szpil. Od tego czasu trocha już minęło i jakoś po lekku udało wrócić sie do normalności. Niestety, po roz kolejny kibice mogli sie rozczarować. Bezradni chopcy zagrali szpil z Hamerykom. Tyrali po trowie, jednak na nic zdoły sie ich wysiłki. Nawet ze zaciśnientym gibisem nie szło zaskoczyć budziorza Hamerykonów. Nie zaskoczył naszych Dudkiem – Dance, po prostu ni mioł okazji, coby sie pociepać na bala. Kożdy przegrany szpil jest dla kibiców smutnym spektaklem. Cienżko paczeć jak coś nie wyłazi. Nie można jednak krziżyków stowiać przed wyjazdem. Abo yno łazić i smyndzić. W końcu zespół pokozoł w eliminacjach swoja forma. Wiadomo, że turniej rzondzi sie swoim prawem i zawsze zdarzajom sie niespodzianki. Nie wolno grozić pionchom abo godać, że jak Leo wtopi ze swoimi, musi tracić sie kaj raki zimujom. Ni ma zawodnika, kiery łobsrawo sie w kadrze. Na dziyń dzisiejszy ziców w autobusie jes menij niż chopców do gronia. Selekcja łoznaczać mo rywalizacja. Pojadom Ci, kierym nojlepij wyłazi gra, bo nigdy w żodnej drużynie nie bydzie dziesienciu Ronhaldinio. A nawet łon tyż podgrzewoł ława. Także sprawdzemy sie w Austrii. Momy jednak na swoim koncie wielki minus, nie tela gra (bo łona nie kożdemu i nie zawsze wyłazi) – ale godka.

Godka, ło bojowym nastawieniu do potyczki z mieszkańcami ziemi odkrytej przez Krzysia Kolumba, godka ło tym coby w przeciwniku widzieć Niemca, godka ło wielkiej formie i łatwości wygrywania - skończyła sie na samej godce. Zachowali my się jak młodzież z piaskownicy. Tam w gembie kożdy tyż jest mocny. I chociażby kożdy fto orła mioł na klacie powracoł i do szpilu w Dortmundzie na mundialu kaj po przegranej z Niemcami chynci zemsty były wielkie, i pod Grunwald kiery mógł duchem bojowym namaścić – to niestety nic to nie dało. Dlatego jak godajom milczenie jes mondrościom. Ludzie jednak wolom fandzolić i głodne godki na mieście zapuszczać niż od czasu do czasu japa zawreć i żodnych dźwięków nie wypuszczać... Słyszołech po losowaniu Ekwadoru i Kostaryki, że grupę przejdziem. Przeszlim, chyba jako piyrsi recepcjom po łachy i do dom. I po co tela godki.

lapp