Słów kilka ło Sylwestrze...

13.02.2007, 16:48

Niejeden z nos yno czeko, aż wyłonaczom na światło dziynne jakoś betlejymka, bo bydzie to znak, że śwjynta som już na dniach. Kożdy fto je łodprawio loto jak koń na wybiegu delektujonc sie czarem tych dni.

Njy godajonc tyż ło sytuacji, kiedy majster na urlopowym papiórze łapa łodciśnie i jednym szkryfnienciem do czi kolejne dni wolnego. Dyć to już szał, tak, że we wilijo Nowego Roku nocka po prowdzie idzie nawet zarwać. Po śwjyntach naród czeko na znak, aż wajzel piźnie w dwanosto, a sylwestrowe walcowanie zbliżo sie w te pyndy jak strzała Robin Hooda. Wszisko jes już wyglancowane. Styknie yno pomyśleć w co sie wyparadzić i czi łoblec łachy z pjyrszej półki.

Ło tej porze miejsce balytowania zazwyczaj jes już nagrane. A wiela gustów, tela metod spyndzania: na zabawie, u kamratów, można na przikład familio zakludzić za granica. Ci co na pjyńć minut przed nie wiedzom kaj polezom, zawsze majom w renkowie jeszcze jedna deska ratunku. Łoblyc rube mantle i zasuwać na miasto. Jak jes przi czim i łoczywiście kaj.

We Pszczynie plac do chwolynia idealny (ło czym nie roz wspominołech) jednak i rok do zadku i w tym roku zawjoło nudom i choćby sie spultać, nic nie szło wskórać. Żodyn muzykant nie wyloz i ludzi do walcowania nie nastrajoł. Rok Pański 2005-12-31: kole pół dwanostej na rynku psy rzyciami szczekały tak głośno, że zdowało mi sie żech nawet pomylił daty. Kole dwanostej ku uciesze zrobiła sie już wjynkszo ciźba, jednak łorganizowanej biby ani widu ani słychu. Pomyślołech wówczas, że łobecno władza cza na kara wciepać i wywieź w las bele dalej i bele tam kaj wjynkszo cima.

Dzisioj prziznom sie, że mój światopogląd jes po przemeblowaniu. Tera jes wszisko na łopak. Wydarzynia z Zakopanego pokozały, że jak ni ma zmobilizowanych sił to czasami lepij dać sie na wstrzymanie i ze szeregu sie nie wychylać. Przeca na imprezie kaj co drugi nadżistany jak kartofel próbuje rozweselać towarzystwo nie może zabraknońć mordoszczelaczy. Co jes żałosne i ło pomsta woło. W Zakopanem mondroków znodło sie dwóch. Niestety wyrwidomb i wyrwitrowka napochali przełokropnie. Nie wiadomo kery długszy, a kery głupszy. Som jednak fakt potraktowanio sześciu ludzi kosom pokozoł, że ftoś ni mioł równo pod kopułom. I ni ma co długo rozprawiać, ale biba, w kierej kichole wyłamują, niejednego łogarnio nimoc i heftuje dalej niż widzi, jak i próby łoklejania pysków powoduje, że człowiek stowo się wylynkany. Świadomość zebranio ze sztachety nie nastrajo łoptymizmym. Masówka idzie zrobić nawet jak ludzie wloli w siebie hektolitry trunków roztomaitej maści. Jedna rzecz – muszom być środki. Jak zaś szeryfy w mieście nie mioły na usługach kafarów to chyba lepij, że koniec roku mioł taki koniec.
KONIEC.

Piotr Łapa

T G+ F

Zobacz także

Dzieci w Rudołtowicach nauczą się mówić bez słów
Dzieci w Rudołtowicach nauczą się mówić bez słów
Remont za kilka milionów
Remont za kilka milionów
Dokument "Tajemnica Ojca Pio" w Pawłowickim GOK-u
Dokument "Tajemnica Ojca Pio" w Pawłowickim GOK-u
Plebiscyt na Wolontariusza Roku Gminy Pszczyna
Plebiscyt na Wolontariusza Roku Gminy Pszczyna
Weekendowy rozkład jazdy
Weekendowy rozkład jazdy

Komentarze:

treść:
autor:

SQL: 18