Paszli won! Z Wami nie godomy

Zdowało sie, że na sesji, kaj bydom głosować nad likwidacjom szkoły, bydzie niezły kocioł. Nikt jednak nie wadził sie, nie wdowoł w ostre dyskusje, a nawet nie fandzolił. Niestety, rodzice, kierzy przyszli mogli przed głosowaniem yno popaczeć. Byli stronom w sprawie, a musieli siedzieć na zicach i czekać na swoja kolej. Łona mioła nadejś pod koniec sesji po głosowaniu. Żodyn z radnych nie wpod na to, coby zmienić porzondek obrad. Dwóch łojców zgłosiło na papiórze chynci do godki, jednak łoni też mogli się odezwać dopiyro na końcu.

Tak tyż radni robili swoje, zaś rodzice jak statyści we filmie siedzieli i paczeli. Radny Zbigniew Jacek pedzioł, że sumienia ni mo i likwidatorem nie bydzie. Te słowa nie wywołały burzy i za chwila decyzja musiała zapaść. W końcu zagłosowali – 11 za likwidacjom, 3 przeciw i jeden sie wstrzimoł. I klamka zapadła. Dopiero jak łojcom dali prawo głosu zrobiło sie goronco. Argumenty, kierymi ciepali powodowały, że Rada przypominała gabinet figur woskowych. Wiadomo, że likwidacja takij placówki budzi wiele kontrowersji. Abstrahujonc jednak łod argumentów obu stron, kożdy powinien mieć prawo zabrania głosu. Tym bardzij, że temat nie łostoł wyczerpany. Kożdy z rodziców, fto planowoł odezwać sie w punkcie wolne głosy i wnioski musioł wpisać sie na kartka. Do godki włączył sie tyż kierownik Gminnego Ośrodka Sportu. I może zaczoł by sie dialog, kieby nie nagły koniec sesji. Mogłoby sie wrencz zdować, że u kogoś w chaupie na stole serwujom już schaboszczaki i łobiad może wystygnońć. Na kartce wyczerpała sie liczba rodziców, kierzy chcieli pedzieć coś w tej sprawie. Poza kolejnościom zaś żodnymu nie pozwolili. Zakończono łobrady. Widać tyn, co mioł dużo do powiedzenia nie wpisoł sie na przikład łosiem razy.

Śmia twierdzić, że rada strzeliła sie samobója. Bo kieby temat wyczerpano, placówka szło by zawreć, zaś rodzice mieliby świadomość, że pedzieli wszisko co mogli. Tera jednak desperacja wzrasto, zaś rodzice mogli poczuć sie, jakby zaserwowano im czorno polewka. A łona oznaczać może jedno - fajny żeś jes, yno sie już zbierej i czasem nie przyłaź. Już kilka godzin po głosowaniu miało iś pjyrsze odwołanie łojców do kuratorium. Widać nie kożdy mo opanowane zasady socjotechniki. Nie zastosowano wienc zasady pogodej sie, a jo i tak zrobia swoje. Błąd. Po to wytrawni gracze stosujom ściema, coby nie narażać się wyborcom. Tukij nawet tego zabrakło.

lapp