Marzy sie tako Łonkacabana

Plaża Copacabana to dla miłośników grzonia sztyrech liter na słońcu raj na ziemi. Kożdy, fto odwiedził brazylijskie wybrzeże durś godo ło wypasionych miejscach do opalania. Mimo że wlezom tam setki tysiency osób i tak ciźba. W końcu rasa z cołkiego świata chce łoboczyć na własne ślypia jeden z nojpienkniejszych kurortów na ziemi. Być może i u nos bryza znad Łąki przyciongnie turystów.

W maju do użytku oddany łostanie Ośrodek Sportów Wodnych, a jak zainwestuje sie w odpowiednio infrastruktura, to ludu bydzie corozki to wjyncej. Jedno co być musi, to pogoda. Toć ona generuje ruch. Świeci klara to sie oblyko bikini abo inne stringi i można nad wodom paradować. Zapomino sie o problymach, kiere dziynnie spyndzajom nom syn z powiek. Skuli słońca wiele ludzi działo jakby sztyry kawy mieli w sobie czyli czuć turbopałer. Jak piździ natomiast, to i ryboków nad wodom jak na lekarstwo. Nawet ryby nie garnom sie do futrowania przynenty.

Coś ostatnio na tym niebie sie zmienio. Luft ciepły, a zima to dla bajtli coś nadzwyczajnego. Iglo i bałwana po prowdzie szło lepić dwa roki do zadku. Jeszcze kilka lot i być może rube mantle wyciepie sie do hasioka. I jakby zawszczasu wybudować całoroczne ośrodki na Zbiorniku Łąckim, to dobrobyt bydymy mieli, prawie jak tam kaj z kokotków ropa dziynnie leci. Ni ma sie co obracać do zadku yno cza działać, bo jak padajom do odważnych świat należy. Nawet w górach z roku na roku coroz to menij śniega, wienc zawodowcy wybierajom Alpy i Dolomity. Nowatorskie rozwionzania to przyszłość. Jak dzisioj możliwa jest budowa wyspy, a tako zrobili, to plaży nie idzie? I bydymy mieli tako swoja Łonkacabana, a kożdy bydzie nom zowiścił. I fto wie. Za lot kilka, kiedy gminno kasa bydzie puchła, a pijendzy nie bydzie kaj mieścić, może władza zniesie podatki.

Wizja może daleko odbiego od normalności. Kożdo mo jednak prawo mieć swoje marzenia. Marzenia bajtli o biołym puchu w zimie stajom sie prawie tak samo odbiegające od rzeczywistości co marzenia o klarze, cieple i dobrobycie. Niestety.

lapp