Bele nie było jak we fusbalu

Jeszcze niedowno zdowało mi sie, że różnica pomiendzy wielkom politykom, a tom samorzondowom jest łogromno. To jakby porównanie kaszlaka z bolidem formuły 1, czyli coś czego ze sobom nie idzie zestawić. Wiejsko mo swoja specyfika - coby sprawnie funkcjonować cza mieć godane, kamratów i grupy wsparcia. Bez nich w pojedynka nie zdziało sie wiele. Zdowało mie sie, że na prowincji gibcij idzie pociś sprawa do przodku, bo sztyrystu dwudziestu posłów to nie kilkunastu. No ale widać nie znom sie ani na samochodach, ani na polityce.

Widać, że nie yno na wierchu lubujom sie w klubach i kołach wzajemnej adoracji. A to daje dużo do myślenia. Bo skoro dobrem gminy czy społeczeństwa kieruje sie kożdy, czym niejeden radny wielokrotnie sie chwoli, to na pierona układy. W kupie siła, szkoda yno, że takie kupy nie zawsze dobrze pachnom i dobrze nie wróżom. Bo może donś do tego, że jak szeryfy w gminach som po stronie kupy, to wszisko układo sie po myśli. Ale jak kożdy mo na sprawa inne zdanie, to prowda zawsze bydzie leżec tam kaj wiynkszość. No i niestety nie zawsze nojważniejszy jest społeczny interes - tak myśla - bo kieby było inaczej, to nikt nie zacieśniołby kryngów na lokalnych szczeblach. Chciołbych sie jednak mylić. Być może te kluby zawionzane akurat w pszczyńskij Radzie majom na myśli yno dobro mieszkańców i ich gminy. Nie bydom sie japić ło bele głupota, a w kożdej sprawie kierować sie bydom społecznym interesem. Jednak niepokój pozostowo. We wyborach na radnych nie głosuje sie na partia, a na konkretne nazwisko, bo kożdego kandydata zno sie dobrze. Nawet jak już wtoś nie zno kandydata osobiście, to kojarzy z gemby. I łon sie liczy. A nie jakoś buła.

Mom wienc nadzieja, że takich sytuacji nie trza, a wrencz nie wolno porównywać z fusbalem. Tam bala jes jedno, a budy som dwie. W polityce powinno grać sie do jednego łokna, wsziyjstko i wszyscy dla dobra mieszkańców. Ach i jeszcze we fusbalu barwy klubowe zmienio sie dość czensto. I liczy sie nie tela kaj, co za wiela. Mom nadzieja, że yno we fusbalu.

lapp