Pszczyna, stąd ni ma wyjścia

Szło sie spodziewać, że jak zacznom w Pszczynie kłaś ruły, lekko nie bydzie. Niestety, tera jak człowiek rano wyjeżdżo z chaupy po żymły, to może wrócić po wieczorynce. Wniosek - absolutnie nie bawić sie w szofera. Gibcij piechty zajdzie sie do Częstochowy niż przejedzie przez centrum. Coby było lepij, dociepali wongla do pieca. Glajzy zawarte i przejechać na Męczenników Oświęcimskich prosto nie idzie. Wiadukt przeżywo więc zwjynkszone natężenie, toć czasami nawet jak na północ człowiek pruje, lepij sie wrócić i jechać do zadku, niż na Bieruńskiej stoć i wycieraczki zeżreć ze złości. Chociaż, jak kieryś mo hercklekoty i lynki, wiaduktem nie przejedzie.

I tak ciźba w mieście jakich mało. A maska szofera z wyszczeżonym gibisem godo wszisko za siebie. Do tego coroz czenścij widoczno jest chamsko praktyka pod tytułem - jo żech czekoł wienc wpuszczoł nie byda. Masakra komunikacyjno trwo. Nie moga nie napisać, że znodłech i pozytywne strony kładzynia kanalizacji, jednak i tak wiem, że zbesztajom mie z marasem. Piyrszy roz łod dowien downa widziołch, jak ekipy robiom po cimoku. Co łoznaczać może, że abo zależy im na tym, że za dnia bydzie menij utrudnień, abo terminy goniom. Tego nie wiem i nie chca wiedzieć. Grunt, że sie nie łobijajom i rantów nie okupujom.

Bele ta sytuacja jednak nie trwała wieki, bo turystów cza bydzie załopaczić w specjalny łosprzent. Apaszka na gemba, tako jakich przi piaskowych burzach sie używo. We wielu miejscach asfalt sfineli, to zaś co pod nim było, furgo w lufcie i pyli, jak yno klara na niebie wylezie. Pech w tym, że inaczej tego zrobić nie idzie.

Sezon na karku, zagroda robiom, parking budujom, bilety łonczone wprowadzajom i na turystów czekajom. Jak doprze póndzie geltasza sie nabije. Jak cos nie wypoli parking oddadzom z poślizgiem, dziury załotajom na jesień, a biletu jak nie było, nie bydzie. To tako rosyjsko ruretka. Jak wyndzie to bydzie wielki sukces. Jak nie, samochody bydom parkowały nom na łepie. A tego żodyn nie szczimie.

lapp