Prowdziwych przyjaciół...

Z faktu, że żyjemy na przełomie dwudziestego i dwudziestego piyrszego wieku nie wiem czy sie śmioć, czy płakać. Jedno co idzie pedzieć, to że nie idzie po lekku nadonżyć. Kiedyś pod Grunwaldem dla przikładu użwyali mieczy. Nawet Krziżoki przysmyczyli nom dwa nagie miecze. Za Tadka Kościuszki szło sie na bój z kosami. Co to łoznaczo? Że sektor zbrojeniowy rozwijoł sie powoli. Nojpiyrwyj pomysł, późnij produkcja i eksploatacja, i tak mineło trocha (384) lot. Toć nieużywanej broni żodyn nie wyciepywoł na hasiok. Wszisko szło swoim rytmem, a i za tym szło sie nadążyć.

Dzisioj jes inaczej. Nasze starziki urodziły sie w czasach, kiedy bajka ło „Bolku i Lolku_” puszczali chyba po ich abrahamie. Późnij łostoł zaś Bolek, kery tyż postawił znak pod polskom historiom. A w perspektywie siedemdziesienciu lot wyprodukowali radia, telewizory, laptopy, palmtopy, mp2, mp3, mp4, nawigacje i pieron wie co jeszcze. Modzi wiedzom, jak działo to co nowe, omki sie tracom. Bajtle nie wiedzom zaś jak działało żelozko na dusza, wrencz nie majom zielonego pojencia co to za prziyrzond i jak wyglondo instrukcja obsługi. Starziki wiedzom. Problem nojwiynkszy jednak w zrozumieniu świata bez tóż, że te pokolynia wyrastały w roztomaitej maści historii. Jedni pamientajom łokopy i wojna, drudzy som świadkami przeistaczania polskigo wojoka w zawodowca.

W czim jednak rzecz? W tym, że jak burmistrz Szostok prziznowoł sie do współpracy z SB. Wydaje sie, że młodym to zwiso, bo nie do końca nawet kumajom ło czim godajom i na cziym sprawa polego. Z drugij strony łojce i starziki pieklom sie, bo dla nich to sprawa priorytetowo. Wyroków wydowoł nie byda, bo łod tego jes sond. Ale jak łobserwuja pewne środowiska to łoroz idzie łoboczyć jak brutalno bywo polityka. Nawet tukij na szczeblach kaj bandera, pod kerom pływo polityczno grupa nie powinno odgrywać tak wielkij sprawy. Po wyborach w towarzystwie nowych władz pokazywało sie trocha ludzi. To zrozumiałe. Toć sukces mo wielu łojców. Po wielkij aferze jakoś tych kamratów nikaj nie widać. Nie bez przipadek zarozki po tym jak zawrzało, rozdzwoniły sie telefony. Tak yno z zapytaniem, czi aby newsy na pewno do nos dotarły. Podobnych zaczepiań, zapytań i telefonów tego dnia było wiyncej. Widać nie mogło to wyznanie obejść sie bez echa.

Po roz kolejny sprawdzo sie zasada, prowdziwych przyjaciół poznowo sie w biedzie. Ciekawe yno czi ftos łostanie na placu boju.

lapp