Pogoda rozdowo karty

Pogoda - to słowo, kiere łorganizatorom imprez plenerowych spyndzo sen z powiek. Nie lygnie sie taki w spokoju, bo durś bydzie w łepie układoł wsziskie elementy, jednak na jedno wpływu ni mo. Jak bydzie prało żabami to może być po imprezie. I tukij jes pies pogrzebany. Ni ma strategii, abo bydzie fajnie, abo nie. Ta decyzja zapado kajś na wierchu. My jako uczestnicy mogemy sie schować pod paryzolem. Czasami prziygtujom kajś namiot, niestety nie kożdy sie zmieści. Przi małej imprezie idzie sie napisać, że w razie niepogody zrobi sie jom w innym terminie. Dużo biba, to logistyczne przedsięwzięcie, na kiere fedruje sie cołki rok. I nie można pedzieć, że nie bydzie na przikład Pikniku Pszczyńskigo, bo padze. Niestety, o ból łepy nie trudno, obserwujonc prognozy pogody.

Jakoś łostatnio mom wrażenie, że ta pogoda to richtik „przepowiadajom_”. Jak yno pacza, to zawsze jes na łopak. Ftoś w telewizji bulknie, że mo być piynknie, to człowiek już batki do łopalania czimie na wierchu i z rana zaczyno sie szmarować olejkami. Pech w tym, że zazwyczaj wtedy w połednie ciemno jak w grudniu po wieczorynce. Zaś jak godajom, że bydzie padać, to uzbrojony w paryzole, peleryny i inne przeciwdeszczowe zabezpieczenia człowiek loto po mieście. I wtedy na jego pecha właśnie świeci klara. Toć jak zapowiedzieli nadejście wiosny i dwudziestostopniowe upały, od tego czasu mój piec szoł jak parowóz - pełnom parom. Cza było hajcować, bo w nocy słupy rtenci spadły poniżej zera. Po lekku wienc chytom sie innych metod przepowiadania. Lepij zadzwonić do kogoś, kogo na deszcz szczyrko w gnatach. Zazwyczaj meteopaci som pewniejsi niż spece ze superkompami. Ale jes metoda sprawdzania, kierej czasy świetności przipadły na mój czas kolonijny. Drewniano góralsko budka. Na pogoda z chaupy wyłaził chop, na niepogoda baba. I to jes pewniejsze.

Od razu godom, że to nie jo wymyśliłech, fto przi jakiej pogodzie opuszczo swoja chatka.

lapp