Podziel sie procyntami

Nie kożdy wciepuje do biksy ludziom na ulicy. Czasami delikwent, kiery zbiero pijondze stowo sie do nos podejrzany. Przipadki pokazywane w mediach łodstraszajom ludzi, bo trudno wyciongać z bajtlika łostatnie kotloki, kiedy pokazujom, że niejeden na zbieractwie dorobił sie poważnej fortuny. Łoszustów nie brakuje i bez tóż nie kożdy mo do nich zaufanie. Inaczej jak kogoś znomy z pyska, bo na lokalnym rynku działo. Yno, że to rzecz zupełnie inno. Wtynczas z uśmiechem do portmanyji łatwij siengnonć i kasa wyłożyć.

Tera jednak można pomóc i nie cza sie odmawiać niczego. Nosz jeden procent podatku i tak w kapsie noszej nie wylonduje. Chyba, że ftoś cygon i z podatków skarbówka szkubie. Kożdy poczciwiec jednak mo prawo do swoiygo procenta i richtik przekazać go może. Tukij wiemy, że i na alufelgi do mercedesa nie dołożemy nikomu, ani do nowyj ajncli, ani na złote haźle. Urzyndy skarbowe majom lista łorganizacji pożytku publicznego, kierym można dować. W powiecie pszczyńskim kasiory z podatku jes tela, że styknie kożdymu. Porachowali i szacuje sie, że bydzie to ponad milion. Wystarczy yno dobro wola. Ułatwili dodatkowo procedura, bez cóż nie trza w papiórach grzebać, na poczta lotać i wcześnij na rachunek płacić. Blank fajnie by było, kiedy kożdy by swoja dola dociepoł. I na chorych bajtli by było, i na fojermanów i reszcie tyż by coś skapneło.

Mom nadzieja, że ta godka to nie darymny futer. Można w końcu pokozać, że człowiek człowiekowi wilkiem nie jest. I zanim za gylynder urzyndu chyci, to poświynci czas i posznupie kaj sie do, dowiadujonc sie fto i na co zbiero. A cza działać gibko, bo za trzi miechy może być po ptokach. Toć tera nawet zawalaty nie bydzie mioł problemu. I chwolić cza naczelnika z urzyndu kiery jak deklarowoł, pracowników o pomoc poprosi. Tak wienc żodyn problemu nie bydzie mioł i dodatkowo informacja łoczimie na miejscu. Styknie jedynie wachować coby rubryki nie minońć. Panie w łokienku nie bydom warczeć na klientów jak wilkołaki w lesie, bo to nie som żodne potwory. Nie noleży sie wienc bać i gemba mieć zawarto. W końcu kożdy mo prawo zaczerpnońć jenzyka. Myśla, że warto pylnońć sie do starzika, omki i ujka, pedzieć tyż co jes na rzeczy. Machina z rozliczaniem już ruszyła, a kasa nie przekazano przepadnie. Bynajmij tym organizacjom, a na noszym placu zgłosiło sie ich dwanoście.

lapp