Leo, nie dej sie omamić

Mundial sie skończył. Szłoby pedzieć „miało być tak świetnie, a zaś było jak zawsze_”. Trudno. Taki jes fuzbal. Złośliwi godajom, że Poloki zawsze grajom czi szpile - szpil otwarcia, szpil o wsziysko i szpil o honor. Tym razem ten łostani tyż my zmaścili.

Byłech i widziołech na własne ślypia co pochali nasi. Kieby sie ftoś zapytoł czy jeszcze roz pojechołbych do Klagenfurtu, odpowiadom bez zastanowienia - ja. Jeżeli człowiek jedzie kibicować, to nie yno jak nasi wygrywajom. Nawet skrajni optymiści muszom zdować sie sprawa, że nie som my światowom potęgom. Najgorszo rzecz jednak, to łodpowiednie nakręcanie. Jak my sprali Czechów przed Euro, zdowało sie, że zarozki bydymy stawiani w roli czornego konia. Lepij jednak nie hajcować sie łod środka i zimno krew czimać. Nie sposób obalać browary po wygranej potyczce, a po zmaszczonych dziewiendziesienciu minutach telewizor balkonem wywalać. Rzeczywistość jes inno. I szkoda mi naszego Leo. Synek próbowoł i wcale nie pedzioł łostatnigo słowa. Kiedy wyszeł z grupy naród chcioł wznosić pomniki, kiedy przyjechoł po turnieju, ludzie zaczeli chorkać i po kontach klachać. Nie chciołbych być w jego skórze.

Nie lubia takich kibiców. Na placu za bajtla tyż sie zdarzali tacy, kierzy sympatyzowali roztomaitym drużynom, bele była na szpicy. Dzisioj Górnik, bo wygroł, jutro Ruch, bo to łon wyloz na piyrsze miejsce, a za miechol Widzew. Podobnie jest w polityce. W nojlepszych czasach łazi taki, kichol zadziero i łep mo dzwignięto do góry. Kiedy łokrent tonie, zamias woda wylewać kiblami za burta, na gibko barwy zamienio, bo zdowo sie, że wiynksze szanse mo przeciwno drużyna.

Potenciał momy jaki momy. I nojlepij zawreć gemba niż beblać i głupio godać. Nie sztuką jes szukać dziury w całym. Zagrali my słabo, podobnie jak na mundialu, co nie łoznaczo, że cza łep spuszczać. A może styknie popaczeć jak wyglądo system szkolenia. Czy tak jak na Zachodzie? Nie. I zamias chwolić sie Piszczkiem, kiery niedowno deptoł trowniki w Goczałkowicach, ludzie yno wionzankami ciepiom. No, to takie normalne, cza sie znoleź kozła ofiarnego. I jak szło przypuszczać jest nim Leo. Szkoda yno, że jego starzy kamraci tyż wrazili łep w piosek.

lapp