Kampania bez ciosów na wysokości batek

Przed wyborami nie sposób nie wdować sie w godka ło polityce. W zasadzie kożdy komu ważny los kraju powinien znać wyborczy termin i pojawić sie kole urny. Niestety tak nie jest, bo i niejednemu zwiso to kole nosa. Chciołech akurat tera skupić sie na innych tematach, jednak polityczno myśl durch łazi mi po łepie.

Nie byda jednak nikogo na piedestały wnosił, skuli tego, że skojarzenie bohatera z partiom odebrano bydzie jako jego bezpłatno reklama. Chociaż nie wiadomo, czi warto tera w ogóle otwierać japa i trudne tematy wałkować. Toć jak człowiek bulknie co za dużo, na drugi dziyń może stracić robota. Zawsze prezesy mogom porachować w hefcie i donś do wniosku, że pracownik ze mie za drogi, a nojlepiyj bydzie jak usuna sie na boczne glajzy. Nie zawsze kożdy jednak w koncie usiedzi i gemba czimie zawarto, jakby knebel gibis prziblokowoł. Nawet jak po materiałach nie piźnie bomba jeno usłyszom salwa jak z małego kapiszona.

Obserwuja to co dzieje sie na lokalnych szczeblach z nadziejom, że tukij, na tym placu zdrowo konkurencja stosować bydom. Oby żodnymu nie prziszła złoto myśl, coby kontrkandydata potraktować niczym Gołota Riddicka Bowe, bo z sierpa na wysokości batek loć przeciwnika nie wolno. Regulamin to rzecz świynto, na tym pułapie wyznaczać powinna go łosobisto kultura. Nikt nie chce widzieć jak jeden na drugigo chorko. Nikt nie chce słuchać wyzwisk pod adresem przeciwnika. Jak sie publicznie napocho, to trudno dziwić sie późnij bajtlom, że w piaskownicy powadzom sie i tuty wyklupiom. Społeczeństwo paczy, jaki prziład idzie z góry. Smutne to, nie roz jednak wierch rzondzi sie swoimi prawami. Kożdy powinien jednak świycić przikładem jak choćby papa smerf, chop kiery w ślypiach smerfnej familije jest stworzyniem bez skazy. Wybory to w końcu nie gnojok, a i powinna być nadzieja, że żodyn z przipadku do polityki nie trefi, bo elwry tam sie nie cisnom. Warto wienc godać jak człowiek i jak człowiek sie zachowywać.

Nie śmieszny jes wienc wons na wyborczych plakatach, bryle, abo głupkowate dopiski. Żałosne som obelgi i wycionganie roztomaitych brudów. Warto skupić sie na tym, co sie mo do zaoferowania i grać fair. Na tym polego kampania, coby człowiek mioł okazja poznać pewno łoferta. Może sie z niom abo zgadzać, abo i nie – ale musi mieć okazja jej poznania. Bywo, że w ferworze walki zapominomy ło najważniejszym. Wyboru dokonujom ludzie i może na tym warto sie skupić.

lapp