Ciźba na jedynce

Kiedyś po DK1 spokojnie mogły se jeździć furmanki. Wsiadoł woźnica, zapinoł konia i jechoł kaj chcioł. Dzisioj ciźba straszno, a o koniach można zapomnieć. Od downa zwiynszko sie liczba samochodów i bele czym jeździć nie idzie. Na dodatek co drugi szofer pruje wiela fabryka dała. Niestety, owe dwa pasy to w sumie sztyry, na kierych ciśnie, za dnia i po cimoku, sztyrdzieści tauzenów aut na jedna doba. Auta, ciżba, pynd równo sie problem, big problem.

Pszczyna dzieli sie jak Polska, na tych, co mieszkajom po lewej abo po prawej stronie Wisły. Yno, że u nos zamiast wody jes asfalt, zaś w lufcie graniczno linia wytyczo unoszoncy sie zapach tanku. Na szczenście to podział geograficzny, a nie społeczny. Ludzie nie dzielom sie na tych lepszych i tych gorszych i żodyn nie dostanie wklupane jedynie za to, że mieszko nie po tej stronie. Co nojwyżej ludzi szłoby dzielić na tych, co do centrum majom bliżyj abo dalij. No i ci drudzy majom przekichane. Coby dotrzeć do miasta, tsza pokonać dwie przeszkody: droga i glajzy. Czasami tako przeprawa trwo wieki. I trudno pedzieć, czy lepij stoć i łoglondać szlabany, majonc przejazd za sobom, czy lepij wbijać sie na krziżoku, myślonc jedynie ło tym, że przejazd bydzie zawarty. Jo wola ta łopcja piyrszo.

Niestety, ale momy w Pszczynie dwie krziżówki, kiere do wypadkogennych należom. Zarówno Polne Domy jak i krziżówka na Hallera potrafiom krwi szoferowi napsuć. Jak człowiek źle trefi, to bydzie stoł wieki, zaś jak zaryzykuje, może to być ostatni jego przejazd. I tukyj tkwi sedno sprawy.
Coś cza z tym zrobić. Ftoś godoł, że na Hallera wciepiom barierki, ino wówczas bydzie sie jeździć do miasta Bieruńskom, kaj i tak durś sie stoi. O światłach padajom, że bydom kolejnom przeszkodom i spowalniaczem. Lepij sie jednak bezpiecznie łobsrować i guzdrać, w całości, niż łobserwować co na DK 1 sie dzieje, z wierchu, łod św. Pyjtra.

Tyż tako uwaga. Kożdy szofer, kery łod strony Bielska we wspomnianych miejscach szykuje sie na prawoskrenty, niech załopaczi sie w dodatkowe żdżadła i peryskopy. Ani sie kapnie, kiedy go ze zadku bydom posuwać. Bo jak to sie godo - pasa zjazdowego brak.

lapp