Wszisko jes do ludzi

Jak tak dalyj póndzie to nadejdom czasy jak w Hameryce kiedy miłośnicy szolki z mocnymi trunkami musieli czaić sie kajś po piwnicach. Łogromny bodygard stoł wtedy w drzwierzach i puszczoł jeno zaufanych i znanych z pyska bywalców. Kożdy kieremu z japy paczało jakby był tajnym gliniorzem wejścia łodmawioł a tamten musioł z bekiem i smakiem wracać do dom. Powód był prosty - zakaz handlu halbom w dni łobjente prohibicjom - a takie dzionki u nos już som. Zanosi sie, że bydom pojawiać sie coroz to czenścij.

Cza sie jednak zastanowić czi aby zakaz kulturalnego "tintania" nie działo na łopak. Tak żech łostatnio we wilijo takigo dnia szczelił rundka po pszczyńskich marketach. Udowom gupigo co kupuje wuszty a w sumie to durś lukom do wózyka coby zejrzeć co tam sie czai. No i niezłe zdziwko. Co drugi ładuje do taszy cały arsenał. Tak na zapas jakby jutro brakło. Nie godajonc że do starych wyjadaczy skrencenie literka na mieście nawet przi zakazach to pestka. A jak nie wolno to łorganizm jakby zarozki punkowo dusza prziwdziewo i buntem sie łobnosi. Przi zakazach to i kontrabanda w siła rośnie i na akcyzie państwo nasze łoszkubuje. Zaś tyn co łożrać sie mo i tak zygzakiem napruty jak fela do dom wracać bydzie a na zakazy żiciom sie łobróci. Jak ftoś nie chce paradować łożarty ani przed familijom, ani przed papieżem, ani przed bajtlami ani przed nikim innym - to nigdy nie bydzie.

Cza pamientać ło tym że nawet farorz we msza kielich z winem wypijo bo taki jes rytuałał i tyż nik nie godo że we świynta czy dziyń powszedni naprany po mieście lotoł bydzie. Bo przeca wszisko jes do ludzi - nawet w Kanie Galilejskij jak napitki brakło to stoł sie cud. Kieby zaś miało być inaczej to woda durś była by wodom a lud łobszeł by sie yno smakiem.

pin