Nigdy nie godej nigdy

Wystympy Poloków na mundialu niejednemu zrobiły poważny łodcisk na mózgu. Nie pokozali nasi, jak sie gro we fuzbal, a naród na to liczył. Mimo iż w eliminacjach szli jak dzikie konie - durś do przodku, pokonujonc kożdo przeszkoda - mundial to do nos wielko katastrofa.

Atmosfera podkrenciło tyż fanzolenie łobozu działaczy, kierzy penkali do rozpuku, śmiejonc sie z „łatwej_” grupy. A nom wklupali tak konkretnie,że chopcy niepotrzebnie chyba rozpakowywali tasze.

I niejeden w transie zastanawioł sie, czy aby nie wyciepać bez łokno telewizora. Jedyne chyba, co powszczimywało przed czornymi myślami, to strach, coby nikomu nie wciepać krzinki na dynia. Bo zakatrupić sonsioda, kiery właśnie z psem loto po placu, skuli tego, że zebrali my ciyngi, skończyłoby sie na ancli w ciupie. Kożdy, wto łosobiście zagościł w Chorzowie na łostatnim szpilu przed czerwcowym wyjazdem do Niemiec, zapieroł sie, że nikaj i nigdy juz nie pojedzie. Ze Pszczyny tyż pokaźno czelodka wracała do dom. Niestety, żoden ni mioł banana na gembie, jak dziewiydziesiont minut wcześnij - a już jak na drugi dzień dowiedzioł sie, że łowalił wiocha, to pieron go szczeloł. Jednak autobusowe deklaracje, że dziołchom łoddaje sie władza w postaci pilota, nie przetrwała długo. A słyszało sie tu i ówdzie, że lepij brazylijski tasiemiec śledzić, niż szpil Poloków łoglondać. Widać wajzel cyko, a czas zaleczo rany. Tak tyż wizja łobserwowania Portugali zaś zelektryzowała cało rasa.

Rajzyfiber przed godzinom zero był tak wielki, że zamiast wylegiwania sie w pryku człowiek lotoł jak struty i wyczekiwoł. Zaś som szpil wciskoł w zic zarówno tych, co w laciach w izbie paczeli jak nasi na pukiel położyli rywali, jak i tych co darli japa na miejscu i do końca wspierali chopoków. I już wiadomo, że zaś zaczyno sie wszysko łod poczontku. Wtopa z Kolumbiom, hercklekoty i wizja wizyty u dochtora, coby podreperować psycha łodeszły w zapomnienie. Tera narodziła sie nowo reprezentacja, a człowiek jak tyn gupielok po roz kolejny doł sie wciongnąć w łodrobina „nieporawnego polskigo łoptymizmu”. Wygrano z Kazachstanem i Portugaliom zrobiła chyba wjyncyj krziwdy niż sie zdowo. Zarozki bowiem rozpoczołech przigotowania do wyjazdu na Belgia. Ino jak zdradzić plany w chaupie i uniknońć godek ło tym, że na łep mi piere. Jakoś sie udało. A wienc przigotowania ruszyły pełnom parom.

Wiadomo, że bojtlik mo swoje dno i coby nie śwjycił pustkami jeszcze przed zameldowaniem sie na Haysel cza łobrać łodpowiednio łopcja. Luftem przeprawa do najtońszych nie należy, wobec czego wybieromy auto. Seicento ze sztyrema chopa zdowo sie najbardzij łoptymalnom wersjom. Tym bardzij że na tanku idzie prziłoszczendzić, bo nie poli to w końcu jak rakieta. I zas żech usłyszoł, coby sie klupnońć w dynia. Sztyrech w malućkim autku to jak kilo szynki w biksie pojemnej na jedna drugo tego. Bez tóż pjyrsze kroki skierowołech po ubezpieczenie - na wszelki wypadek, bo nigdy człowiek nie wie, czi kajś nie wkaruje. Z papiórami w kapsie, łodpowiednim zapasem klapsznit ruszomy ze Pszczyny, coby udać sie w długi rejs. Na miejscu wylondowali my gibcyj niż F 16 sprowadzane z hameryki i to bezawaryjnie. Pjykno łokolica, masa Poloków, nienajgryfniejsze frele, bo Polkom żodno nie dorówno i zwycistwo. Po roz kolejny wkrencili nom korba i pokozali, że lepij sie już nie zapierać.

agw