Nie robisz - źle, robisz - jeszcze gorzej

Ni ma lepszego sposobu podziynkowania za łorganizacja imprezy, niż zbesztanie samych łorganizatorów. Zdowo sie wrencz, że proporcjonalnie co do wzrostu ilości imprez w powiecie pszczyńskim wzrasto ludzkie niezadowolenie. Tak wienc trudno tera po ludzkim spyndzie spodziewać sie czyrwonego dywanu, fanfarów i ciepłego słowa. Tym bardzij, że przez wielu roztomaite koncerty czy inne łobchody już na kilka dni przed należom do nieudanych.
Podobno sytuacja jest na przikład z Dniami Pszczyny - ftoś na internecie napisoł swoja opinia, czyli pedzioł co wiedzioł dajonc do zrozumienia, że yno Kombii może cieszyć sie zainteresowaniem, a reszta programu jest do bani i bez pomyślunku. I można tyrać przed imprezom jak Michael Jonson na szterysta i tak to nic nie do. Biba przekreślono, zaś na organizatorze nie pozostawiom suchej nitki. Jakby tak człowiek miołby sie brać wszisko do serca, to nic nikaj by sie nie dzioło, zaś cołko rasa jeno by tak na zicu siedziała i yno po łepie dropała, to byłoby dobrze. Glyndzić i mieleć jenzorem umi kożdy. Jak przindzie zaś coś zrobic to szukej wiatru w polu.
Mandaryna - na nia krytycy z sieci tyż narychtowali rube działa. Na samo wieść o scenicznych wystympach nastompił frontalny atak. A efekt? Kilkanaście tauzenów ludzi jakie przilazło na pszczyński piknik, bawiło sie znakomicie, mimo, że nie kożdy lubi jej artystyczny dorobek. Ale coś sie bynajmij dzieje i szło poszaleć. Locomotive Sun czi Szantana (znajdujoncy sie zresztom w tegorocznym programie Dni Pszczyny) - jedni znaleźli sie w RMF Maxxx na szpicy wyróżnieni w konkursie, drudzy zaś na Daszyńskigo rok do zadku tyż zgotowali świetno atmosfera - a KOMBII - majom swój heft w historii i masa hiciorów. Majom i to sie chwoli. Jednak zgrzitanie gibisem przed imprezom nie jest na miejscu. Zawsze jest gwiazda i ftoś, fto niom nie jest. To tak jakby kibic sportowy na zawodach czekoł jedynie na skoki Isenbajewy, a reszta mogłaby iść do dom, bo żodno i tak wyżej nie chipnie.
I po co ciepać głupimi maskami i ludzi nerwować? Jak nie podobo sie, to zawsze można lygnońć i kanapa opanować. Popaczeć w krzinia i wielkie sławy, co nie na żywca, a z playbeku cedzom podziwiać.
Na szczynście jes w łokolicy kilku takich, co godki krytyki spływajom im po puklu. Robiom swoje i za to należy sie pochwała.

lapp