Na naszym placu dobrze sie dzieje

Nie cza mieszkać w kraju kaj we wilijo niejeden hamburgerami sie łobżero i zielone pod poduszka wrażo, coby jak złoty gibis zabłysnońć w świecie. Chociaż zdowało sie, że afera rozporkowo tamtejszych włodarzy mo wjynkszo wartość niźli naszo rodzimo, nic bardzij mylnego. Widać som my równie mocni. Łostatanio nawet u buchmacherów łobstowiali fto łojcem i fto to przi interesach swoim interesem wymiato. I nawet chocioż „czorny koń” nie łokazoł sie futrem łod bajtla, to kraj zwariował i ło niczym innym godać nie chce. Larmo, haje, klachanie i tłumaczenia, że w sejmowym hotelu jeno geburstag i zocny gyszynk razem jeden z jednom do izby wnosili. Wnioski wienc takie, że żoden ło zberezeństwach nie myśloł i za zolyty sie nie zabieroł. A jednak dziołcha wskazała palcem, ftoś zafuczoł i łoroz nawet na Jamajce zamias w rytmach reagge sie bujać to za politykowanie sie wzieli i sprawa w kierej rzekomo galoty ze rzici spadały lustrujom. My ludzie, łoni ludzie także majom prawo godać i czytać co sie im podobo. Jeszcze kilka podobnych newsów to ludzie pomyślom, że we wielkim świecie to jak w długaśnym tasiemcu. Heniek loto za Zosiom, kiero podkochuje się w Norbercie. Norbert mo fretka z prowincji, z tym, że kocho Heńka, zaś jego babka czidzieści lot do zadku na zachód wyjechała i nik nie wiedzioł, że i Heniek i Zosia i Norbert som po jednym łojcu.

Na szczynście Pszczyna i powiat ni mo ani sejmowego hotelu, ani członków w żodnej sprośnej akcji uwikłanych. I kiedy tak jeden drugimu sie w szczynka po plaskaczu daje, niech ludzie wiedzom, że na naszym placu dobrze sie dzieje, a poupychane papióry i teczki sprawy przesądzić nie mogom. Dyć nie zawsze cza na pukiel włazić i szpetne, prywatne grzeszki na światło wywlekać bo dondzie do sytuacji kiedy wrażenie łostanie jedno. Świat gizdami i chachorami wyścielony. I tera kiedy do jednych nojważniejsze som ptoki i roztomaite ich aspekty nos zadowolą najzwyklejsze krzoki.

Łostatnio u nos kole dwiesta piendziesiont dymbów do zola wrazili i bajtle co dzisioj som jeszcze frupami, własnym jenzykiem beblajom i ło krzokach nie myślom – za kilkadziesiąt lot takie działania docyniom. Nie jes to zresztom łostatnie dobrodziejstwo. Działanie pozytywne numer dwa – lodowisko. Ledwo konsek lodu przi plusie wyskubali zarozki rasa ruszyła. Widać modzi nie yno ło pierdołach myślom bo i starziki i modziany rube fuzekle łoblykom, łyżwy życzajom i na lód wyłażom. Działanie pozytywne numer czi – jarmark. Śwjynta na karku to i czas szaleństwa i wydowania pijendzy. Som i choinkowe taile, i jodło, i napitka. Jednym słowem wszisko co na jarmarkach być powinno. Zaś w weekend niejeden z zewnątrz przikludzi familio i pjykne miasto podziwioł bydzie. Yno za pierona żoden jakoś na ta Paleja połasić sie ni może. Mimo podchodów i hurałoptymistycznych wieści łobiekt stoi, a kupca nie widać. Jednak przi pozytywnym myślyniu i działaniu

agw