Jedziesz? Pij mlyko

Żodnygo nie dziwujom doniesienia, kiedy gliniorze chycom nadżistanego jak kartofel szofera. Obrazki, jak z leksza słaby właściciel pojazdu po zaczimaniu wypado z zica na zol, tyż już były przerabiane i som wrencz mało zaskakujonce. Zaskakujonce bardzij tera som statystyki łożartych rowerzystów. Widać, jak nie można brusić po drogach autem, to lepij czimać sie koła. Niestety, takie myślenie nojpryndzyj doprowadzi właściciela dwóch kółek na izba wyczeźwień i przed łoblicze temidy. Jak godajom stare babki - Polok to potrafi - i znaleźli sie chyntni, coby przechytrzyć prawo.

Na prośba internautów portalu Infopres.pl prziszło nom łobadać sprawa, czi idzie jechać na tandemie (dwuosobowym kole), ze zadku yno jako pasażer. Założenia - kieryjoncy i pendałujoncy po brałzie, zaś na tylnim zicku narombany i nie pendałujoncy delikwent. Zdowało sie, że takij łopcji nikt nie broł pod uwaga. A jednak. Polismen z pszyńskij policji, z kierym prziszło mi godać, wyjaśnił cołko sprawa. Ni ma takij łopcji. Naprany pasażer nawet jak nie bydzie wywijoł szłapami i tak nie może jechać. Styknie przeca, że jak bydzie sie kolyboł to eknie koło i przidrożny rant zaliczony. A po cimoku to i guliki wyrastajom jak grziby po deszczu. Tak, że jak ftoś zaleje chroboka, to niech sie lepij kopśnie taryfa. Nie dondzie wówczas do tragedii, bo choćby sie yno obalił i lekko poturbowoł, to łażonc z nowym gibisem i flostrem, nowej urody i tak nie nabyndzie. Zagrożenie jest wielkie i skuli tego niebezpieczno plaga cza wyeliminować. A strach jest. W końcu nie doś, że idzie papióry stracić, mandat prziwlec, to jeszcze niejedno dziołcha przez klopsztanga, co na placu stoi przewiesi i siłom głupota zneutralizuje. Coby nigdy w prziszłości ukochanej osobie drugi raz na dekel nie pizło. Szofery dejcie sie pozór. Jedziecie! Pijcie mlyko!
A na dodatek bydziecie wielcy.

lapp