Dejcie sie pozór – komórka bywo zgubno

Esemesowanie jes niebezpieczne. Coroz wiynecej prziypadków zdowo sie potwierdzo ta teza. Nie bynajmij, że łod klupania w knefle zaniemogom nom mienśnie, a późnij wdadzom sie jakieś infekcje. Człowiek łazi z komórom i świata nie widzi. Nawet Ci, kierzy rzekomo majom podzielno uwaga, cisnom sie na droga, nie paczonc jak lezom.

Telefon niejednego już zgubił. Nie wolno tak robić. Na autobanie, przi prendkości przepisowej sto czidzieści, jak sie człowiek zagapi to może być już po ptokach. A uwaga skupio sie nie tela na rytualnym pisaniu, co na treści. Styknie, że przindzie tajemniczy esemes: „Te Jorguś, Apolinary zaś na sesji poszoł po bandzie”. Wówczas zainteresowany szofer mo kajś szterowanie swoim bolidem. Może napochać, bo ważniejsze jes zrozumienie komunikatu i gibka odpowiedź: „Ja, nosz lokalny pitbul mo już tako natura”. I tak dochodzi do nieszczęść. Podzielność uwagi, takom słyszołech wykładnie, to proces wykonywania kilku rzeczy. Jednak uwaga rozkłado sie po kilka sekund na zajencie. A nie wszisko łoroz. Esemesowanie przi pewnych czynnościach wyłanczo nos z łotoczenia. Ni ma sie wienc co dziwić, że człowiek przifanzoli w latarnia, kiedy ta stanie mu na drodze. Jeżeli skończy sie jedynie na boloku, to jeszcze pół biedy. A społeczeństwo chyba tego nie widzi.

W Irlandii politycy już rozpoczeli kampania, coby młodych i bajtli zniechęcić łod łażenia po mieście i pisania. Ftoś problem dostrzegł. Ciekawe yno kiedy u nos bydzie podobnie. Bo jak na razie nie dziwi widok szofera, kery prziylepiony do szyby jedzie jak łożarty, bo zajynty jes klachaniem. Zdarzajom sie i inne przipadki. Szofer kurzy cygareta, pisze esemesa i jedzie. To już lekko przesada, bo prendzyj czi późnij auto wylonduje w rancie. Przipadków takich jes wiele, nie kożdy jednak sie do tego przizno. To tak jak z wypadkiem z udziałem szofera kery, ucieł sie za kółkiem komara. Nikt nie usneł, ale żodyn nie wie jak to sie mogło stać.

Warto zmienić swoje nawyki. Toć nie kożdo wiadomość jes na tela pilno, że cza jom wysyłać niezależnie łod sytuacji. Nie godajonc, że i tak ni ma gwarancji, że dondzie. Czasami sie zdarzo, że esemesy idom przez Kamczatka.

lapp