Ach te wnuczki...
12.09.2006, 14:21 |
Nie tak downo cza było młode dziołchy z powiatu pszczyńskigo przestrzegać przed gizdem, kiery sie za nie zabieroł, późnij zaś łobrabioł i sagie z kotlokami w hotelu łostawioł. Dzisioj sytuacja tyż nieciekawo, szczególnie dla omek. Modno jes bowiem metoda wyciongania z portmanyj łod starki pokaźnej sumy pijendzy czyli tak zwano metoda na wnuczka. Widać z tych bandziorów tera niezłe aparaty. Żoden ni mo skrupułów we wciskaniu babce kitów i to nie swoij - ale łod poczontku.
Najważniejszy w tej metodzie jes rekonesans. Pieron złodziejaszek doskonale łorientuje sie w rodzinnej sytuacji. Zno imiona nazwiska i najważniejsze rzeczy z życia famili kiero chce łopendzlować. Po zebraniu wiadomości rozpoczyno łoperacja. Zazwyczaj chachor nie działo som yno mo spółka. Dzwoni wienc do starki kiero wzion na tapeta i pado jej że go pili i na gwołt poczebuje mamony. A że babka we wnukach zazwyczaj widzi cołki świat, pyndzi jak łopentano do banku i wybiero gotówka. Jeszcze lepij jak mo szczajono w izbie we fuzeklach, wtedy łoszczyndzi sie szłapy i gibko pomoże. Niestety ani sie boroka sprawy nie zdowo z tego, że koleś po drugij stronie telefonu to nie jej pociecha. Nieświadomo babka łyko wsziskie kloty i po lekku ustawio sie z modym na łodbiór gotówy. Wówczas dowiaduje się, że po kasa przindzie kamrat, bo wnuczek nie może. Fedruje kajś, jes zmaraszony i w ogóle nie urwie sie ze szychty. Ale jak zapewnio, źródło pewne i sprawdzone. „Babko dosz mu pijondze, dyć godom ci, że to nie łożerok i nikaj z pełnym bajtlikiem po szynkach lotoł nie bydzie” puszczo tako nawijka i cieszy miska widzonc już skarby we własnej kapsie. Jak kapusta znojdzie sie w łapach łodbierajoncego, to już jes po ptokach.
Tym sposobem penzyjo kiero była - przepado jak poranno żymła - roz i na wieki. Na koniec, doś, że bez pijendzy to jeszcze cza zwykle takigo newsa czaić przed dziadkiem. Bo jak trefi sie jaki krewki to jeszcze Hejzel w chaupie zrobi, izba zdemoluje i jak łobrażony gemba zawre to do świont nie łotworzy. Najlepij wienc w takij sytuacji wnuczka do dom na spytki zawołać, kawa łobalić, poklachać i wymiany gotówki na tak zwanego „żywca” dokonać.
ez